Адам өміріне араша болу – дәрігер үшін үлкен жауапкершілік пен кәсіби шеберлікті талап ететін абыройлы міндет. Созақ аудандық орталық ауруханасының хирург мамандары кезекті күрделі операцияны сәтті орындап, жедел ішек өтімсіздігі диагнозымен түскен 43 жастағы науқастың өмірін сақтап қалды.
Науқас ауруханаға ішінің қатты ауыруы, құсу және ішінің кебуі сияқты мазасыздандыратын белгілермен жедел жеткізілген. Дәрігерлер науқастың жағдайын жан-жақты тексеріп, қажетті диагностикалық шараларды жүргізу барысында жедел ішек өтімсіздігін анықтады. Уақытты жоғалтпай, науқастың өміріне қауіп төндірмеу үшін шұғыл түрде хирургиялық ем жүргізу туралы шешім қабылданды.
Ота кезінде дәрігерлер тоқ ішекте көлемді ісіктің бар екенін анықтады. Аурудың асқынуына жол бермеу мақсатында хирургиялық топ оң жақтық гемиколэктомия операциясын жасап, ісік орналасқан зақымданған ішек бөлігін толық алып тастады.
Күрделі хирургиялық араласу бірнеше кезеңді қамтығанымен, медициналық мамандардың үйлесімді жұмысының нәтижесінде операция сәтті аяқталды. Операциядан кейін науқас дәрігерлердің тұрақты бақылауында болып, тиісті ем-дом қабылдады. Емдеу шараларының нәтижесінде денсаулық жағдайы жақсарып, науқас қанағаттанарлық жағдайда үйіне шығарылды.
Мұндай күрделі оталардың аудандық деңгейде жасалуы – медициналық көмектің қолжетімділігін арттыру бағытындағы маңызды қадам. Бұған дейін күрделі хирургиялық көмек алу үшін шалғай елді мекен тұрғындары облыс орталығына баруға мәжбүр болса, бүгінде бірқатар медициналық қызметтерді өз ауданында алуға мүмкіндік бар.
Осы ретте, міндетті әлеуметтік медициналық сақтандыру жүйесінің де маңызы зор. МӘМС аясында көрсетілетін медициналық қызметтер тұрғындардың қажетті емді уақытылы алуына мүмкіндік беріп, денсаулық сақтау саласының қолжетімділігін қамтамасыз етуге бағытталған.
Айта кетейік, 2026 жылдың басынан бері Созақ аудандық орталық ауруханасында МӘМС аясында 112 операция жасалған. Бұл – аудандық аурухана дәрігерлерінің кәсіби біліктілігі мен медициналық көмектің сапасын арттыру бағытындағы жүйелі жұмысының нақты нәтижесі.
Дәрігерлердің тәжірибесі, заманауи медициналық мүмкіндіктер және дер кезінде көрсетілген көмек – адам өмірін сақтап қалудың басты кепілі. Созақ аудандық орталық ауруханасында тұрғындарға сапалы медициналық қызмет көрсету, күрделі жағдайларда жедел әрі тиімді көмек көрсету жұмыстары алдағы уақытта да жалғасын табады.
