Сауран ауданының әкімі Мақсат Таңғатаров Ж.Тәшенов атындағы жалпы білім беретін мектепке арнайы барып, білім ордасының жаңа оқу жылына дайындығын тексерді.
1976 жылы 640 оқушыға арналған мектеп ғимаратында қазіргі таңда 1035 оқушы білім алуда. Білім алушылар санының артуына байланысты мектептің материалдық-техникалық базасын жаңарту, оқу процесіне қолайлы жағдай қалыптастыру және ғимараттың қауіпсіздігін қамтамасыз ету мәселелерінің маңызы артып отыр.
Қазіргі уақытта мектеп ғимаратында күрделі жөндеу жұмыстары жүргізілуде. Нысанды аралау барысында аудан әкімі құрылыс жұмыстарының орындалу барысымен танысып, сынып бөлмелеріндегі, дәліздердегі, ғимараттың ішкі және сыртқы бөліктеріндегі жөндеу жұмыстарын көрді. Сонымен қатар, құрылыс барысында пайдаланылатын материалдардың сапасына, жұмыстардың белгіленген талаптарға сәйкестігіне және еңбек қауіпсіздігі шараларының сақталуына назар аударды.
Жауапты мамандар мектептің жаңа оқу жылына дайындығы бойынша атқарылып жатқан жұмыстар жөнінде баяндады. Білім ошағында оқу кабинеттерін ретке келтіру, санитариялық жағдайды қамтамасыз ету, электр желілері мен инженерлік жүйелердің жарамдылығын тексеру, мектеп аумағын абаттандыру және қауіпсіздік талаптарын күшейту бағытында тиісті шаралар қолға алынған.
Аудан әкімі мектепті аралау кезінде оқушылардың қауіпсіздігіне ерекше назар аударды. Атап айтқанда, эвакуациялық шығу жолдарының талапқа сай болуы, өрт қауіпсіздігі құралдарының жарақталуы, бейнебақылау жүйелерінің жұмыс жағдайы, мектеп аумағының қоршаулары мен кіріп-шығу жолдарының қауіпсіздігі секілді мәселелерді пысықтады.
Сонымен бірге, алдағы жылыту маусымына дайындық барысы да жан-жақты қаралды. Мектептің жылыту жүйесінің техникалық жағдайы, қазандықтың және инженерлік желілердің дайындығы, жылу құбырларының жай-күйі тексерілді. Қысқы кезеңде білім беру процесінің үздіксіз жүруі үшін барлық қажетті жұмыстарды алдын ала аяқтаудың маңыздылығы атап өтілді.
Бүгінде білім беру ұйымдарын жаңа оқу жылына сапалы дайындау – жергілікті атқарушы органдардың басты міндеттерінің бірі. Себебі, оқушының сапалы білім алуы үшін заманауи оқу кабинеттерімен қатар, қауіпсіз, таза әрі жайлы білім беру ортасы да қажет.
Осыған байланысты, аудан әкімі мердігер мекеме өкілдері мен жауапты сала мамандарына күрделі жөндеу жұмыстарын сапалы жүргізіп, белгіленген мерзімде толық аяқтауды тапсырды. Әрбір атқарылған жұмыстың сапасына жауапкершілікпен қарап, анықталған кемшіліктерді дер кезінде жою қажеттігін ескертті.
Сондай-ақ, мектептің жаңа оқу жылына дайындығын күнделікті бақылауда ұстап, барлық жұмыстардың бекітілген жоспарға сәйкес орындалуын қамтамасыз ету жөнінде нақты міндеттер жүктеді.
Мектеп – жас ұрпақтың білім алып, тұлға ретінде қалыптасатын маңызды әлеуметтік нысан. Сондықтан, білім беру ғимараттарының жай-күйін жақсарту, оқу процесіне қажетті жағдай жасау және қауіпсіздікті қамтамасыз ету бағытындағы жұмыстар алдағы уақытта да тұрақты жалғасын табады.
Жаңа оқу жылын ұйымдасқан түрде қарсы алу үшін Сауран ауданындағы білім беру ұйымдарында дайындық жұмыстары кезең-кезеңімен жүргізілуде. Бұл жұмыстардың негізгі мақсаты – оқушылар мен ұстаздарға қолайлы жағдай жасап, оқу процесінің қауіпсіз әрі сапалы өтуін қамтамасыз ету.
