Мемлекет басшысы Қасым-Жомарт Тоқаевтың бастамасымен елімізде жүзеге асырылып жатқан «Таза Қазақстан» республикалық экологиялық акциясы қоршаған ортаны қорғау мәдениетін қалыптастыруға, табиғатты аялауға және азаматтардың экологиялық жауапкершілігін арттыруға бағытталған маңызды жалпыұлттық бастамаға айналды. Аталған акция аясында еліміздің барлық өңірлерінде қоршаған ортаны таза ұстауға, елді мекендерді көркейтуге және тұрғындардың экологиялық мәдениетін нығайтуға бағытталған іс-шаралар тұрақты түрде ұйымдастырылуда.
Тазалық – әрбір азаматтың туған жеріне деген сүйіспеншілігі мен жауапкершілігінің нақты көрінісі. Мемлекет басшысы өз Жолдауларында және түрлі деңгейдегі кездесулерінде экологиялық мәдениетті қалыптастыру, табиғатты қорғау және елді мекендердің тазалығын сақтау – әр азаматтың ортақ міндеті екенін үнемі атап келеді. Осы тұрғыдан алғанда, «Таза Қазақстан» акциясы қоғамда жауапкершілік мәдениетін қалыптастырып, қоршаған ортаға жанашырлықпен қарауды дәріптейтін маңызды жоба болып табылады.
Осы игі бастама аясында Түркістан облысы дене шынықтыру және спорт басқармасына қарасты «Отырар аудандық №1 балалар және жасөспірімдер спорт мектебі» коммуналдық мемлекеттік мекемесінің ұжымы «Оқсыз» спорт кешенінің аумағында ауқымды сенбілік жұмыстарын өткізді.
Сенбілік барысында мекеме қызметкерлері спорт кешенінің аумағын тұрмыстық қалдықтардан тазартып, жасыл желек аумақтарын ретке келтірді, ағаштардың түптерін қопсытып, айналаны абаттандыру және санитарлық тазалықты сақтау бағытында кешенді жұмыстар жүргізді. Сонымен қатар, қоршаған ортаның тазалығын сақтау, қоғамдық орындарды күтіп ұстау және экологиялық мәдениетті қалыптастырудың маңыздылығы кеңінен насихатталды.
Мұндай іс-шаралар қоршаған ортаның тазалығын қамтамасыз етіп қана қоймай, тұрғындар арасында экологиялық сана мен мәдениетті нығайтуға, жастарды еңбекқорлыққа, туған жерді қадірлеуге және табиғатты қорғауға тәрбиелеуге зор үлес қосады.
Алдағы уақытта да Түркістан облысы дене шынықтыру және спорт басқармасының «Отырар аудандық №1 балалар және жасөспірімдер спорт мектебі» КММ ұжымы Мемлекет басшысы бастамашы болған «Таза Қазақстан» республикалық экологиялық акциясына белсенді қатысып, табиғатты қорғау, қоршаған ортаның тазалығын сақтау және өңірдің экологиялық ахуалын жақсартуға бағытталған жұмыстарды жүйелі түрде жалғастыра береді.
