Сауран ауданының әкімі Мақсат Таңғатаровтың төрағалығымен аппараттық мәжіліс өтіп, ауданның әлеуметтік-экономикалық даму көрсеткіштері мен өзекті мәселелердің орындалу барысы жан-жақты талқыланды.
Мәжіліс барысында күн тәртібіне сәйкес аудан аумағындағы заңсыз құрылыс нысандарын анықтау, олардың алдын алу және жою бағытында атқарылып жатқан жұмыстардың жай-күйі қаралды. Бұл ретте құрылыс саласындағы заң талаптарының сақталуын қамтамасыз ету, жергілікті атқарушы органдар тарапынан бақылау жұмыстарын күшейту және заңсыз құрылыстарға қатысты тиісті шараларды қабылдау мәселелері сараланды. Сонымен қатар, жауапты сала басшылары тарапынан атқарылған жұмыстар бойынша есептер тыңдалып, алдағы кезеңге арналған міндеттер айқындалды.
Мемлекет басшысы Қасым-Жомарт Тоқаев елді мекендерді сапалы жоспарлау, құрылыс саласында заңдылық пен тәртіпті қамтамасыз ету мемлекеттік саясаттың басым бағыттарының бірі екенін атап өткен болатын. Осыған сәйкес ауданда құрылыс нысандарының белгіленген талаптарға сай жүргізілуін қамтамасыз ету және сәулет-құрылыс нормаларының сақталуын бақылау жұмыстары жүйелі түрде жалғасуда.
Аппараттық мәжілісте аудандық маңызы бар автомобиль жолдарының жағдайы мен жөндеу жұмыстарының орындалу барысы да кеңінен талқыланды. Жауапты бөлім басшылары жол жөндеу жобаларының жүзеге асырылуы, мердігер мекемелердің міндеттемелерді орындауы және инфрақұрылымдық нысандардың сапасы жөнінде баяндама жасады. Аудан әкімі жол құрылысы мен жөндеу жұмыстарының белгіленген мерзімде әрі сапалы орындалуы тұрғындардың өмір сүру сапасын арттырудағы маңызды фактор екенін атап өтті.
Президент Қасым-Жомарт Тоқаев өзінің Қазақстан халқына Жолдауларында өңірлердің көлік-логистикалық әлеуетін арттыру, жол инфрақұрылымын жаңғырту және халыққа қолайлы жағдай жасау міндеттерін тұрақты түрде көтеріп келеді. Осы бағыттағы тапсырмаларды орындау мақсатында Сауран ауданында жол сапасын жақсарту және көлік қатынасын дамыту бойынша жұмыстар кезең-кезеңімен жүзеге асырылуда.
Сонымен қатар, мәжілісте «Отбасының цифрлық картасы» ақпараттық жүйесіндегі D және E санатындағы отбасылар санын азайту бағытында атқарылып жатқан жұмыстар қаралды. Әлеуметтік қолдау шараларының тиімділігі, азаматтарды тұрақты жұмыспен қамту, кәсіпкерлікті дамыту арқылы табысын арттыру және халықтың әл-ауқатын жақсарту бағытындағы жұмыстардың нәтижелері талқыланды.
Мемлекет басшысы халықтың тұрмыс сапасын жақсарту, әлеуметтік әділеттілікті қамтамасыз ету және атаулы әлеуметтік көмектің тиімділігін арттыру мәселелеріне ерекше назар аударып келеді. Осыған орай, ауданда әлеуметтік осал топтарды қолдау, жұмыспен қамту шараларын күшейту және отбасы институтын нығайту бағытындағы жұмыстар тұрақты бақылауда тұр.
Жиын қорытындысында аудан әкімі жауапты сала басшыларына көтерілген мәселелер бойынша нақты тапсырмалар беріп, барлық жұмыстардың сапалы әрі уақытылы орындалуын қамтамасыз етуді міндеттеді. Сондай-ақ, белгіленген индикаторларға қол жеткізу үшін бақылауды күшейтіп, нәтижеге бағытталған жұмысты жүйелі түрде жалғастыру қажеттігін атап өтті.
Аппараттық мәжілісте қаралған мәселелер ауданның тұрақты дамуын қамтамасыз етуге, инфрақұрылымды жетілдіруге, заңдылық пен тәртіпті нығайтуға және тұрғындардың әл-ауқатын арттыруға бағытталған мемлекеттік саясаттың негізгі басымдықтарымен сабақтасып, алдағы уақытта да өз жалғасын табатын болады.
