Сауран ауданында мемлекеттік саясаттың негізгі басымдықтарын сапалы іске асыру, Президент Қасым-Жомарт Тоқаев жүктеген міндеттерді жүйелі орындау және ауданның әлеуметтік-экономикалық дамуын қамтамасыз ету бағытындағы жұмыстар тұрақты бақылауда. Осы мақсатта өткізілетін аппараттық мәжілістер мемлекеттік басқарудың тиімділігін арттыруға, салааралық үйлесімді нығайтуға және халықтың өмір сүру сапасын жақсартуға бағытталған нақты міндеттерді айқындауға мүмкіндік береді.
Осыған орай, Сауран ауданының әкімі Мақсат Таңғатаровтың төрағалығымен өткен аппараттық мәжілісте ауданның әлеуметтік-экономикалық дамуына, елді мекендердің сәулеттік келбетін қалыптастыруға және мемлекеттік басқару тиімділігін арттыруға қатысты өзекті мәселелер жан-жақты қаралды. Мәжіліске аудан әкімдігіне қарасты бөлім басшылары мен жауапты сала жетекшілері қатысты.
Күн тәртібіндегі алғашқы мәселе бойынша аудандағы елді мекендердің сәулеттік келбетін жүйелеу және заңсыз құрылыс нысандарының алдын алу бағытында атқарылып жатқан жұмыстар талқыланды. Бұл жөнінде Құрылыс, сәулет және қала құрылысы бөлімінің басшысының орынбасары Сұлтанмұрат Нұрмұхаммед баяндама жасап, құрылыс саласында қолданыстағы заңнама талаптарының сақталуы, сәулеттік талаптардың орындалуы және бақылау жұмыстарының барысы туралы жан-жақты мәлімет берді. Сонымен қатар, заңсыз құрылысқа жол бермеу, құрылыс мәдениетін қалыптастыру және елді мекендердің сәулеттік келбетін біріздендіру бағытындағы жұмыстарды күшейту қажеттігі айтылды.
Мәжілісте сондай-ақ, Отбасының цифрлық картасы ақпараттық жүйесіндегі D және E санатындағы отбасылардың санын азайтуға бағытталған жұмыстардың орындалу барысы қаралды. Жұмыспен қамту және әлеуметтік бағдарламалар бөлімінің басшысы Асылбек Дауырхан әлеуметтік қолдау шараларының тиімділігі, жұмыспен қамту тетіктерін кеңейту, мемлекеттік бағдарламаларға тарту және тұрмыстық жағдайы төмен отбасылардың әл-ауқатын жақсарту бағытында атқарылып жатқан жұмыстар жөнінде баяндама жасады.
Күн тәртібіндегі үшінші мәселе аясында орындаушылық тәртіптің сақталуы, берілген тапсырмалардың орындалу деңгейі және аудан аумағында жүргізілген мониторинг барысында анықталған кемшіліктер талқыланды. Ұйымдастыру-инспекторлық жұмыс және аумақтық даму бөлімінің басшысы Шәми Мағжан анықталған мәселелер бойынша қабылданған шаралар туралы ақпарат беріп, орындаушылық тәртіпті күшейту мен бақылау жұмыстарын жүйелі жалғастырудың маңыздылығына тоқталды.
Мәжіліс барысында көтерілген барлық мәселелер бойынша жауапты бөлім басшыларының есептері тыңдалып, нақты ұсыныстар қарастырылды. Аудан әкімі әрбір бағыттағы жұмыстың нәтижелілігін арттырудың маңызын атап өтіп, мемлекеттік бағдарламалардың сапалы орындалуы, халыққа көрсетілетін қызметтердің тиімділігін көтеру және белгіленген көрсеткіштерге қол жеткізу бағытында жүйелі жұмысты жалғастыру қажеттігін жеткізді.
Аппараттық мәжілісті қорытындылаған аудан әкімі жауапты бөлім басшыларына қаралған барлық мәселелер бойынша нақты тапсырмалар жүктеп, олардың сапалы әрі мерзімінде орындалуын қатаң бақылауда ұстауды тапсырды. Сондай-ақ, анықталған кемшіліктерді қысқа мерзімде жоюды, орындаушылық тәртіпті күшейтуді және әрбір көрсеткіш бойынша нәтижелі жұмысты қамтамасыз етудің маңыздылығын атап өтті.
Жиында берілген тапсырмалар Мемлекет басшысы айқындаған «Заң мен тәртіп», тиімді мемлекеттік басқару, халықтың әл-ауқатын арттыру және өңірлердің теңгерімді дамуын қамтамасыз ету бағытындағы мемлекеттік саясаттың негізгі басымдықтарымен сабақтас. Бұл міндеттердің сапалы орындалуы ауданның әлеуметтік-экономикалық әлеуетін нығайтып, елді мекендердің сәулеттік келбетін жақсартуға, әлеуметтік қолдау шараларының тиімділігін арттыруға және тұрғындардың өмір сүру сапасын көтеруге оң ықпал етеді.
Сауран ауданында алдағы кезеңде де Президент тапсырмаларын жүйелі жүзеге асыру, мемлекеттік бағдарламалардың орындалуын қамтамасыз ету, халыққа қолайлы әрі қауіпсіз өмір сүру ортасын қалыптастыру және ауданның тұрақты дамуына бағытталған кешенді жұмыстар жалғасатын болады.
