Елімізде білім беру жүйесін жаңғырту, педагогтердің кәсіби құзыреттілігін арттыру және білім сапасын жетілдіру бағытында жүйелі жұмыстар жүзеге асырылып келеді. Осы мақсаттағы маңызды іс-шаралардың бірі – 2026 жылғы 16–17 шілде күндері Астана қаласында өткен «Бастауыш мектеп: сапалы өзгерістер және кәсіби даму» атты республикалық жазғы сессия болды.
Еліміздің әр өңірінен жиналған бастауыш сынып мұғалімдерінің басын қосқан ауқымды жиын жаңа оқу жылының басым бағыттарын талқылауға, озық тәжірибелермен алмасуға және педагогтердің кәсіби біліктілігін арттыруға мүмкіндік берді.
Сессия барысында Қазақстан Республикасының Конституциясы негізінде жүзеге асырылатын «Адал азамат» біртұтас тәрбие бағдарламасы, «Таза Қазақстан» экологиялық тұжырымдамасы, «Заң және тәртіп» қағидаттарын білім беру үдерісіне енгізу мәселелері кеңінен қарастырылды. Сонымен қатар, жасанды интеллект мүмкіндіктерін оқу-тәрбие жұмысында тиімді пайдалану, мұғалімдердің цифрлық құзыреттілігін жетілдіру және заманауи оқыту әдістерін қолдану бағытындағы өзекті мәселелер талқыланды.
Аталған республикалық жиынға Түркістан облысының делегациясы құрамында Сауран ауданының Төле би атындағы жалпы білім беретін мектебінің бастауыш сынып мұғалімі Қасымбаева Бибигүл Шараповна қатысып, тәжірибе алмасу алаңында белсенділік танытты.
Сессия барысында Ыбырай Алтынсарин атындағы Ұлттық білім академиясының жетекші ғалымдары 2026–2027 оқу жылындағы бастауыш білім берудің негізгі бағыттары бойынша мазмұнды баяндамалар жасап, білім беру мазмұнын жетілдірудің басым бағыттарына тоқталды.
Іс-шара аясында Қазақстан Республикасының Оқу-ағарту министрімен өткен ашық диалог педагогтерге өз ұсыныстары мен пікірлерін білдіруге мүмкіндік берді. Кездесуде жаңа оқу жылына дайындық, бастауыш білім сапасын арттыру, педагогтерді әдістемелік қолдау, оқушылардың кітап оқу мәдениетін қалыптастыру және жасанды интеллектіні білім беру үдерісінде тиімді қолдану мәселелері кеңінен талқыланды.
Мұндай кәсіби алаңдар мұғалімдердің тәжірибе алмасуына, жаңа білім мен заманауи әдістерді меңгеруіне жол ашып, білім беру сапасын арттыруға ықпал етеді. Бұл өз кезегінде еліміздегі білім беру реформаларын табысты іске асыруға және өскелең ұрпақтың сапалы білім алуына негіз қалайды.
Республикалық жазғы сессия қорытындысы бойынша қатысушыларға арнайы сертификаттар табысталды. Осындай маңызды білім алаңына қатысқан Қасымбаева Бибигүл Шараповнаның жаңа оқу жылында алған тәжірибесі мен тың идеяларын оқу-тәрбие үдерісінде тиімді қолданып, шәкірттердің жан-жақты дамуына және сапалы білім алуына өз үлесін қоса беретініне сенім мол.
