Сауран ауданының әкімі Мақсат Таңғатаровтың төрағалығымен аудан әкімдігі жанындағы құқық бұзушылықтардың алдын алу жөніндегі ведомствоаралық комиссияның мәжілісі өтті. Жиынға аудан прокуроры Алмаз Асылбеков, аудандық полиция бөлімінің басшылығы, дербес бөлімдердің жетекшілері және ауылдық округ әкімдері қатысты.
Мәжілістің негізгі мақсаты – аудан аумағында қоғамдық тәртіп пен қауіпсіздікті қамтамасыз ету, құқық бұзушылықтардың алдын алу бағытында атқарылып жатқан жұмыстардың тиімділігін саралау және профилактикалық іс-шараларды одан әрі жетілдіру.
Күн тәртібіне сәйкес, аудандағы қылмыстық ахуал мен құқық бұзушылықтардың жай-күйі талданып, олардың алдын алу бойынша жүзеге асырылып жатқан шаралардың нәтижелері қаралды. Сонымен қатар, қоғамдық орындардағы қауіпсіздікті қамтамасыз ету, құқық бұзушылыққа бейім азаматтармен жеке профилактикалық жұмыстар жүргізу, отбасылық-тұрмыстық жанжалдардың алдын алу және жастар мен жасөспірімдер арасында құқық бұзушылыққа жол бермеу мәселелеріне басымдық берілді.
Жиын барысында жауапты сала басшылары атқарылған жұмыстар жөнінде баяндама жасап, құқық бұзушылықтардың орын алуына ықпал ететін себептер мен жағдайларға тоқталды. Анықталған кемшіліктерді жою, профилактикалық есепте тұрған азаматтармен жұмысты күшейту, әлеуметтік тұрғыдан қолдауды қажет ететін отбасыларға тиісті көмек көрсету және құқықтық түсіндіру жұмыстарын жүйелі түрде жүргізу бойынша ұсыныстар айтылды.
Әсіресе, кәмелетке толмағандар арасындағы құқық бұзушылықтардың алдын алу мәселесіне ерекше назар аударылды. Бұл бағытта білім беру ұйымдары, полиция органдары, ата-аналар және жергілікті атқарушы органдар арасындағы өзара байланысты күшейту, жасөспірімдердің бос уақытын тиімді ұйымдастыру және құқықтық сауаттылығын арттыру қажеттігі атап өтілді.
Сондай-ақ, ауылдық округтердегі қоғамдық қауіпсіздік мәселелері қаралып, елді мекендерде құқық бұзушылықтың алдын алу бойынша жүргізіліп жатқан жұмыстардың нәтижелілігін арттыру міндеті қойылды. Тұрғындармен тұрақты кездесулер өткізу, азаматтардың ұсыныстары мен өтініштерін зерделеу, проблемалық аумақтарды анықтап, тиісті шаралар қабылдау қажеттігі айтылды.
Аудан әкімі Мақсат Таңғатаров құқық бұзушылықтардың алдын алу жұмыстары тек орын алған жағдайларға ден қоюмен шектелмеуі керектігін атап өтті. Оның айтуынша, құқық бұзушылыққа алып келетін себептерді алдын ала анықтап, оларды жоюға бағытталған кешенді профилактикалық шараларды тұрақты түрде жүргізу маңызды.
Сонымен қатар, мемлекеттік органдар мен құқық қорғау құрылымдарының өзара іс-қимылын күшейту, ақпарат алмасу тетіктерін жетілдіру және әрбір бағыт бойынша нақты нәтижеге қол жеткізу қажеттігі тапсырылды.
Жиын қорытындысымен жауапты мемлекеттік органдар мен ауылдық округ әкімдеріне қоғамдық тәртіпті сақтау, құқық бұзушылықтардың алдын алу және тұрғындардың қауіпсіздігін қамтамасыз ету бағытында бірқатар нақты тапсырмалар берілді. Тапсырмалардың орындалуын бақылауда ұстау және атқарылған жұмыстардың нәтижесін тұрақты түрде талдау міндеттелді.
Қоғамдық қауіпсіздікті қамтамасыз ету, құқық бұзушылықтардың алдын алу және тұрғындардың құқықтық мәдениетін арттыру бағытындағы жұмыстар Сауран ауданында алдағы уақытта да жүйелі түрде жалғасатын болады.
