Жаңа білім ордасы ауыл балаларына заманауи білім алуға мүмкіндік беріп, ауданның білім беру инфрақұрылымын дамытуға жол ашты.
Сауран ауданындағы білім беру саласында жаңа оқу жылы маңызды жаңалықпен басталды. Бабайқорған ауылдық округіне қарасты Абай елді мекенінде 300 орындық Абай атындағы жалпы білім беретін жаңа мектеп пайдалануға берілді.
Жаңа білім ордасының ашылу салтанатына Түркістан облысы әкімінің орынбасары Еркебұлан Дауылбаев, Сауран ауданының әкімі Мақсат Таңғатаров, білім саласының өкілдері, ауыл тұрғындары, ұстаздар мен оқушылар қатысты.
Жаңа мектептің пайдалануға берілуі – бір ғана білім нысанының ашылуы емес. Бұл ауыл балалары үшін білім алудың жаңа мүмкіндіктерін қалыптастыратын, мектеп инфрақұрылымын жаңғыртуға бағытталған мемлекеттік саясаттың нақты көріністерінің бірі. Балаға жағдай жасау – білім саясатының басты бағыты болып табылады.
Мемлекет басшысы білім мен бала болашағын ел дамуының басым бағыттарының бірі ретінде айқындап келеді. Осыған байланысты елімізде мектептер салу, үш ауысымды және апатты мектептер мәселесін шешу, оқушы орындарының тапшылығын азайту, білім беру ұйымдарының материалдық-техникалық базасын жаңарту бағытындағы жұмыстар жалғасуда.
Түркістан облысында бұл мәселенің өзектілігі ерекше. Өңірдегі халық санының және мектеп жасындағы балалар санының өсуі жаңа білім беру нысандарына деген қажеттілікті арттырып отыр. Облыс әкімінің орынбасары Еркебұлан Дауылбаев жаңа мектептің ашылу салтанатында білім беру инфрақұрылымын дамыту балалардың болашағына жасалған маңызды инвестиция екенін атап өтті. Оның айтуынша, бүгінде Қазақстандағы 8 мыңға жуық мектептің 1100-ден астамы Түркістан облысында орналасқан. Өңірде 550 мыңнан астам оқушы білім алуда. Оқушылар санының жыл сайын артуы жаңа мектептерге деген сұранысты күшейтіп отырғаны да осыдан көрінеді.
Сондықтан, Абай елді мекеніндегі жаңа мектептің іске қосылуы ауылдағы білім беру орындарына түсетін жүктемені азайтып қана қоймай, балалардың заманауи талаптарға сай білім алуына жағдай жасауға мүмкіндік береді.
Түркістан облысы құрылыс басқармасының тапсырысымен салынған үш қабатты мектеп ғимараты 300 оқушыға есептелген. Жаңа білім ордасында оқу процесін ұйымдастыруға қажетті негізгі нысандар қарастырылған. Атап айтқанда, мектепте 70 орындық асхана, 40 орындық оқу залы бар кітапхана, спорт және акт залдары, шеберхана, медициналық кабинет, заманауи оқу сыныптары орналасқан. Білім беру нысаны электр, жылу, сумен жабдықтау және кәріз жүйелерімен толық қамтылған. Жер телімінің аумағы 6 275 шаршы метр болса, ғимараттың пайдалы ауданы 4 174 шаршы метрді құрайды. Құрылыс жұмыстары 2025 жылғы наурыз айында басталып, 2026 жылғы тамызда аяқталған. Яғни, бір жылдың ішінде ауылда 300 оқушыға арналған толыққанды білім беру инфрақұрылымы қалыптастырылды.
Заманауи мектеп – тек ғимарат емес. Бүгінгі таңда мектеп салу мәселесіне тек оқушыға орын дайындау тұрғысынан қарау жеткіліксіз. Заманауи мектеп – баланың сапалы білім алуына, спортпен шұғылдануына, кітап оқуына, шығармашылық қабілетін дамытуына және қауіпсіз ортада тәрбиеленуіне мүмкіндік беретін кешенді білім беру кеңістігі. Осы тұрғыдан алғанда, Абай атындағы жаңа мектептің инфрақұрылымы оқушының әртүрлі бағытта дамуына жағдай жасауға бағытталған. Спорт залы – дене шынықтыру мен спорттық қабілетті дамытуға, акт залы – шығармашылық және мәдени іс-шараларға, кітапхана – оқу мәдениетін қалыптастыруға, шеберхана – еңбекке баулуға мүмкіндік береді. Бұл – қазіргі білім беру жүйесінде қалыптасып келе жатқан жаңа талаптардың бірі.
Жаңа мектепте 40 орындық оқу залы бар кітапхананың қарастырылуы да білім беру процесінің маңызды бөлігі. Цифрлық технологиялар кеңінен қолданылатын кезеңде кітаптың білім алудағы рөлі төмендеген жоқ. Керісінше, ақпарат көлемі артқан сайын баланың ақпаратты саралау, талдау, салыстыру және өз ойын сауатты жеткізу қабілетіне қойылатын талап күшейіп келеді.
Оқу мәдениетін қалыптастыру мектеп қабырғасынан басталады. Баланың кітапханаға тұрақты баруы, көркем әдебиетке қызығушылығының артуы, қазақ әдебиетіндегі шығармаларды оқуы оның сөздік қорын ғана емес, дүниетанымын да кеңейтеді. Сондықтан, жаңа мектептегі кітапхана мен оқу залы тек қосымша бөлме емес, оқушының білімін тереңдететін маңызды ортаға айналуы тиіс.
Жаңа білім ордасының тағы бір маңызды міндеті – сапалы біліммен қатар мемлекеттік тілдің қолданысын кеңейту. Мемлекеттік тілдегі білім – ұлттық құндылық болып табылады. Мектеп – баланың қазақ тілін меңгеріп қана қоймай, оны күнделікті қарым-қатынас пен білім алу тілі ретінде қалыптастыратын негізгі ортаның бірі. Қазақ тіліндегі кітаптар, оқу материалдары, танымдық ақпараттар мен қосымша әдебиеттердің қолжетімді болуы оқушылардың тілдік сауаттылығын арттыруға ықпал етеді. Мемлекеттік тілдің беделін арттыру тек тіл сабағында емес, мектептің күнделікті өмірінде жүзеге асуы керек. Оқушының өз ойын қазақ тілінде еркін жеткізуі, кітап оқуы және білімін мемлекеттік тілде жетілдіруі – ұлттық құндылықтарды сақтаудың маңызды тетігі.
Қазақстандағы білім беру инфрақұрылымын жаңғырту бағыттарының бірі – заманауи мектептер қалыптастыру. «Келешек мектептері» жобасы аясында көтеріліп отырған негізгі мәселелердің бірі де – балаға сапалы білім алуға қолайлы, қауіпсіз әрі заманауи орта қалыптастыру. Абай елді мекеніндегі жаңа мектептің пайдалануға берілуі осы бағыттағы жұмыстардың ауылдық жерлерде де маңызды екенін көрсетеді. Өйткені, сапалы білім алуға мүмкіндік баланың тұрғылықты жеріне байланысты болмауы тиіс. Ауыл баласы да заманауи сыныпта білім алып, спортпен айналысып, кітап оқып, шығармашылық қабілетін дамытуға мүмкіндік алуы керек. Бұл – білім саласындағы тең мүмкіндік қағидатының нақты көрінісі.
Мектептің жаңаруы тек оқушыға ғана емес, ұстазға да жаңа мүмкіндік береді.
Заманауи оқу кабинеттері мен қажетті инфрақұрылым педагогке сабақ өткізу барысында жаңа әдістерді қолдануға, оқушының қабілетіне қарай жұмыс жүргізуге мүмкіндік береді. Білім сапасы туралы сөз болғанда педагогтің кәсіби әлеуеті бірінші кезекте ескерілуі тиіс. Мұғалімге қолайлы еңбек жағдайын жасау, оның шығармашылық ізденісіне мүмкіндік беру және кәсіби дамуын қолдау – педагог мәртебесін арттырудың маңызды құрамдас бөлігі. Сондықтан, жаңа мектептің ашылуы ұстаздар қауымы үшін де жаңа оқу ортасының қалыптасуын білдіреді.
Қазіргі білім беру саясатының маңызды бағыттарының бірі – баланың қауіпсіздігі мен жан-жақты дамуына жағдай жасау. Жаңа мектепте медициналық кабинет, спорт залы, асхана және басқа да қажетті нысандардың болуы осы талаптардың орындалуына мүмкіндік береді.
Баланың мектепте өзін қауіпсіз сезінуі, дұрыс тамақтануы, дене шынықтырумен айналысуы және шығармашылық бағытта дамуы оның оқу үлгеріміне де оң әсер етеді. Бұл ретте, мектеп пен ата-ананың өзара байланысы да маңызды. Балаға сапалы білім беру тек мектептің міндеті емес. Отбасы, ұстаз және қоғам бір бағытта жұмыс істеген жағдайда ғана баланың әлеуетін толық ашуға мүмкіндік туады.
Бүгінде Сауран ауданында 64 білім беру ұйымы жұмыс істейді. Ауданда 25 мыңға жуық оқушы білім алады. Ал, биыл 2 333 бүлдіршін алғаш рет мектеп табалдырығын аттады. Бұл көрсеткіштер аудан бойынша білім беру инфрақұрылымын үнемі дамыту қажеттігін көрсетеді. Халық саны мен оқушылар санының өсуі жаңа мектептер салуды ғана емес, қолданыстағы білім беру ұйымдарының материалдық-техникалық базасын жаңартуды, педагог кадрлардың кәсіби деңгейін арттыруды және оқушылар үшін қосымша білім алу мүмкіндіктерін кеңейтуді талап етеді.
Абай елді мекеніндегі 300 орындық жаңа мектептің ашылу салтанатында қонақтар білім ордасының оқу сыныптарын аралап, материалдық-техникалық базасымен танысты. Жаңа мектептің ашылуы ауыл тұрғындары үшін де маңызды оқиғаға айналды. Өйткені, мектеп – кез келген елді мекеннің әлеуметтік өміріндегі негізгі нысандардың бірі. Мұнда бала білім алып қана қоймайды. Оның дүниетанымы қалыптасады, достары табылады, алғашқы қоғамдық тәжірибесі жинақталады. Сондықтан мектепке салынған қаржы – тек құрылысқа жұмсалған қаражат емес, елдің адами капиталына бағытталған инвестиция.
Абай атындағы жаңа білім ордасының басты нәтижесі оның қабырғасында қанша оқушы білім алғанымен ғана өлшенбейді. Ең маңызды нәтиже – осы мектептен қандай азаматтар шығатынында. Заңды құрметтейтін, мемлекеттік тілін білетін, кітап оқитын, білімге ұмтылатын, еңбекке жауапкершілікпен қарайтын және ел болашағына үлес қосуға дайын ұрпақ қалыптастыру – жаңа мектептің ең үлкен миссиясы.
Жаңа оқу жылының басталуымен қатар пайдалануға берілген Абай атындағы 300 орындық мектеп Сауран ауданындағы білім беру инфрақұрылымын дамытуға жаңа серпін беріп, ауыл балалары үшін сапалы білімге жол ашатын маңызды нысанға айналмақ.
